KASE алаңында Кредиттік серіктестіктер қауымдастығы мүшелері үшін капитал нарығына шығу мәселелері бойынша семинар өтті

Қазақстан қор биржасы (KASE) алаңында Кредиттік серіктестіктер қауымдастығымен бірлескен іс-шара өтті. Кездесу кредиттік серіктестіктер мен шағын және орта бизнес субъектілерінің (ШОБ) бағалы қағаздар нарығы арқылы қаржыландыру тарту мүмкіндіктеріне арналды.

Қатысушылар кредиттік серіктестіктердің қор нарығына шығу перспективаларын, облигациялық қаржыландыру құралдарын, листинг талаптарын, сондай-ақ ақпаратты ашып көрсету және эмитенттердің ашықтығын арттыру тетіктерін талқылады.

Кредиттік серіктестіктер қауымдастығы АӨК Басқарма төрағасы Альмира Сағат бүгінгі таңда кредиттік серіктестіктер үшін нарықтың өзгермелі жағдайларына бейімделу маңызды екенін атап өтті.

"Бізге қаржы институттары ретінде қазіргі және әлеуетті қарыз алушылар үшін қосымша қаржыландыру көздерін іздеу қажет. Қазір тұрақты даму моделін қалыптастырып, капитал нарығының жаңа мүмкіндіктерін пайдалану аса маңызды", – деді ол.

Alatau City Invest компаниясының Инвест банкинг директоры Нұргүл Амирханова облигациялар шығару және эмитенттерді капитал нарығында сүйемелдеу бойынша практикалық тәжірибесін бөлісті.

"Облигациялар тек ірі корпорацияларға арналған құрал емес. Қазақстанның капитал нарығына шығу ШОБ үшін де қолжетімді, ал бағалы қағаздар нарығы бүгінде ең икемді әрі сұранысқа ие қаржыландыру көздерінің біріне айналып келеді", – деп атап өтті Нұргүл Амирханова.

KASE Басқарма төрағасының бизнесті дамыту жөніндегі кеңесшісі Ермек Мажекенов өңірлер экономикасы мен кәсіпкерлікті дамытудағы кредиттік серіктестіктердің маңыздылығына тоқталды.

"KASE жаңа эмитенттер тобының пайда болуын құптайды және тек сауда алаңы ретінде ғана емес, қор нарығын экономиканың нақты секторы үшін түсінікті әрі қолжетімді етуге көмектесетін серіктес ретінде де қолдау көрсетуге дайын", – деді Ермек Мажекенов.

Кездесу соңында семинарға белсенді қатысқаны және қаржы секторы мен кредиттік серіктестіктер арасындағы диалогты дамытуға қосқан үлесі үшін қатысушыларға сертификаттар табысталды.