KASE алаңында компаниялардың IPO-ға шығуының негізгі аспектілері талқыланды
12 мамырда Қазақстан қор биржасы (KASE) алаңында компаниялардың жария капитал нарығына шығуға дайындалуының негізгі аспектілеріне арналған "IPO-ға шығуға дайындық" семинары өтті.
Спикер ретінде мәмілелерді сүйемелдеу жөніндегі сарапшы, BeOne Kazakhstan компаниясының басқарушы серіктесі Амангелді Мұсаев сөз сөйледі.
Семинар аясында компанияларды IPO-ға дайындау мәселелері, оның ішінде корпоративтік басқару, аудит, ақпаратты ашып көрсету және инвесторлармен өзара іс-қимыл тақырыптары қарастырылды.
Сарапшының айтуынша, компаниялар IPO-ға шығу туралы шешімді әртүрлі себептерге байланысты қабылдайды. Олардың қатарында одан әрі өсу үшін капитал тарту, брендтің танымалдылығын арттыру, бедел мен кредиттік қабілетті нығайту, инвесторлар базасын кеңейту, сондай-ақ акцияларды жаңа активтерді сатып алу және ұзақмерзімді даму стратегиясын іске асыру құралы ретінде пайдалану бар.
"IPO-ға дайындық - бұл капитал нарығына шығу стратегиясын қалыптастыруды, корпоративтік басқаруды, ашық қаржылық есептілікті, заңдық құрылымды, ақпараттық қауіпсіздікті және инвесторлармен тиімді өзара іс-қимылды қамтитын кешенді жұмыс", - деп атап өтті Амангелді Мұсаев.
Кездесу барысында жаңа эмитенттерге қатысты инвесторлардың күтулеріне де ерекше назар аударылды. Сарапшының сөзінше, инвесторлар тұрақты бизнес-модельге, қызметтің ашықтығына, корпоративтік басқару сапасына, компанияның бәсекелестік артықшылықтарына, өсу перспективаларына және түсінікті инвестициялық тарихына мән береді.
"IPO - бұл үлкен жолдың алғашқы қадамы ғана. Орналастырудан кейін компания инвесторларға жарияланған жоспарлардың орындалуын операциялық тұрғыдан дәлелдеп, бизнес құнының одан әрі өсуін қамтамасыз етуге тиіс", - деп түйіндеді Амангелді Мұсаев.
Семинар практикалық тәжірибе алмасуға және компанияларды IPO-ға дайындаудың өзекті тәсілдерін талқылауға арналған алаңға айналды.