Қазақстан қор биржасында (KASE) тәуекел, кірістілік және капиталдың сақталуы арасындағы теңгерімді қалыптастыру мәселелері талқыланды
KASE Академиясы Қазақстан қор биржасы (KASE) алаңында "Тәуекел, кірістілік және әртараптандыру" атты білім беру семинарын ұйымдастырды. Спикер ретінде BCC Invest портфельдік менеджері Уәлихан Бикен сөз сөйледі.
Кездесу барысында қатысушылар инвестициялау "сәттілікке бәс тігу" емес, мақсат, мерзім, тәуекел және портфель құрылымы маңызды рөл атқаратын шешімдер жүйесі екенін талқылады. Инвестор табысының қалай қалыптасатыны, инфляцияны не үшін ескеру қажет екені және жоғары кірістіліктің артында шын мәнінде не тұрғаны мәселелеріне ерекше назар аударылды.
Сондай-ақ инвестициялық тәуекелдің негізгі түрлері – нарықтық, валюталық, кредиттік, инфляциялық және мінез-құлықтық тәуекелдер қарастырылды. Қатысушылар тәуекелді бағалаудың базалық метрикаларымен және "кванттар" деп аталатын мамандар қолданатын сандық талдау қағидаттарымен танысты. Бұл мамандар нарықтарды талдау және инвестициялық стратегияларды тестілеу үшін математика, статистика және бағдарламалауды пайдаланады.
Семинардың негізгі тақырыптарының бірі әртараптандыру болды. Уәлихан Бикен портфельдің тұрақтылығы бір ғана "жұлдыз" қағазға емес, активтерді сыныптар, секторлар, валюталар және инвестициялау көкжиектері бойынша сауатты бөлуге байланысты екенін атап өтті. Сонымен қатар тәуекел бейіндері әртүрлі портфельдің мысалдары, қайта теңгерімдеу тәсілдері және инвесторлардың жиі жіберетін қателіктері – "үлгермей қаламын" деген қорқынышпен эмоцияға беріліп сатып алудан бастап дүрбелеңмен сатуға дейінгі әрекеттер талқыланды.
Семинар инвестициялаудың базалық қағидаттарын зерделеуге, тәуекелдерді басқаруға және ұзақмерзімді тұрақты инвестициялық стратегия қалыптастыруға қызығушылық танытқан қатысушылардың басын қосты.