KASE фьючерстері: инфрақұрылым дайын, брокерлерді күтеміз

IX Conference Capital Markets Kazakhstan конференциясында "KASE клиринг орталығы" АҚ Басқарма төрағасының орынбасары Идель Сабитов KASE мерзімді нарығының даму перспективалары туралы айтып берді.

Биржаның мерзімді нарығының негізін жеткізілімсіз валюталық фьючерстер құрайды. Қатысушыларға KASE Индексіне және жекелеген акцияға негізделген фьючерстер де қолжетімді. 2026 жылғы 05 қазанда қаржы құралдарының қатары EUR/KZT және CNY/KZT бағамдарына есеп айырысу фьючерстерімен толықты.

Мерзімді нарықтағы сауда-саттық айналымының негізгі бөлігі USD/KZT бағамына негізделген фьючерске тиесілі. Бұл секторда 38 қатысушыға сауда-саттыққа қатысу мүмкіндігі берілген. Валюталық фьючерстер бойынша баға белгілеуді екі маркет-мейкер – "SQIF Capital" АҚ және "Банк ЦентрКредит" АҚ қолдайды.

Нарықты дамытудың келесі қадамы брокерлердің өз қолданбалары арқылы осы өнімді клиенттеріне ұсынуымен байланысты.

"Брокерлердің қайсысы бұл өнімді бірінші болып клиенттердің кең ауқымына ұсынса, сол әлеуетті клиенттердің басым бөлігін өзіне жұмылдырады", – деп атап өтті Идель Сабитов.

Биржа брокерлермен бірлесіп, фьючерстерді клиенттер арасында ілгерілетуге дайын және кәсіби қатысушылардың нарықты дамыту жөніндегі ұсыныстарына ашық.

Спикердің айтуынша, теңгенің АҚШ долларына қатысты спот нарығының өтімділігі өте жоғары. Сондықтан уақыт өте келе осы бағамға негізделген фьючерс те өз клиенттерін табады, ал кейіннен индекске негізделген фьючерске және басқа да құралдарға сұраныс қалыптасады.