KASE-дегі семинар: инвестордың қызығушылығынан нақты мәмілеге дейін

Компания жаһандық инвесторға түсінікті болуы үшін не қажет? Егер инвестор қажетті деректі жылдам тауып, салыстырып, пайдалана алмаса, roadshow өткізу және ақпаратты жариялау жеткілікті ме?

Бұл мәселелер KASE Академиясы ұйымдастырған Global Settlement & Post-Trade Infrastructure семинарында талқыланды. Семинарға Crossbridge Advisors компаниясының Founder & Principal және халықаралық капитал нарықтары мен биржалық инфрақұрылымда көпжылдық тәжірибесі бар сарапшы Jason L. Paltrowitz қатысты.

Спикердің айтуынша, компанияны ілгерілетудің өзі жеткіліксіз. Эмитент туралы ақпарат халықаралық инвесторлар жұмыс істейтін ортада, яғни танымал ақпараттық платформаларда, сондай-ақ брокерлік жүйелерде қолжетімді болуы тиіс.

Jason L. Paltrowitz ағылшын тілінде ақпаратты ашып көрсетуге, қаржылық есептілікке және инвесторға компания туралы ақпаратты жылдам тауып, салыстыруға мүмкіндік беретін форматтағы деректерге ерекше назар аударды.

Спикер ақпаратты жариялаудың өзі инвестор оны тауып, түсініп, инвестициялық шешім қабылдау кезінде пайдалана алады дегенді білдірмейтінін атап өтті.

Ақпараттың қолжетімді әрі түсінікті болуы - жаһандық инвесторлардың қазақстандық эмитенттерге қызығушылығын арттырудың маңызды факторларының бірі.